Siet Froo un Dankboa!

Toom Läsen:  Filippa 4:4-7
             "Freit junt emma em Harn!  Un ekj saj junt noch eemol:  Freit junt!  Lot aulemaun seenen, woo leeftolich jie sent!  De Har es dicht bie!  Sorcht junt om nuscht.  Lot Gott met bäden un prachren un dankscheen sajen aules weeten waut junt fält!  Un Gott sien Fräd, dee wiet äwa aules jeit waut Menschen vestonen kjennen, woat june Hoaten un Jedanken en Christus Jesus bewoaren!"
 
            Von aule Menschen opp de Welt, dee waut Kjristen sennen haben de jratsta Uasoak toom sikj freien:  Gott haft sikj selfst bekaunt jemoakt too ons un haft ons siene groote Leew jewäsen derch sien eensja Sän, Jesus Christus, derch wäm wie de Radunk haben.  Wie haben en Christus een wajch no ons Voda waut niemols ea jewast es!  Hee es de Wajch, de Woarheit, un daut Läwen, un kjeena kjemt nom Voda buta derch derch am! (Johanes 14:6).  Dit es wuarom Paulus kaun too de Filippa sajen, "Freit junt emma em Harn!  Un ekj saj junt noch eemol:  Freit junt!"  (Filippa 4:4).  Wie, dee waut haben daut baste Jeschenkj jekjräajen waut jeemols jewast es sullen dee sennen waut de jratsta Freid un Fräd haben, un dolste leeftolich sennen von aule Menschen.  Wie sellen nich soo läwen aus de Welt, oba enne Woarheit läwen un Leew haben fa aule Menschen, besondasch fa de Kjoakj, toom dee oppbuaren.
            En mien ieejnet Läwen sent doa foaken Tieden wua ekj woa en daut ekj leicht vegrunst sie:  foaken kaun een kjlienet Dinkj jenuach sennen toom miene Freid wajch nämen!  De Uasoak fa dit es wäajen ekj sie nich dankboa jenuach.  Eenjemol denkj ekj blooss aun de Dinja waut ekj nich hab, un vejät toom dankboa sennen fa aules waut Gott mie aul haft jejäft.  Nochmol denkj ekj blooss aun mie selfst un nich mol aun miene Fru, mol rajcht wan see emma bie mie es!  Woo väl dolla vejät ekj dan von Gott, wäm ekj nich seenen kaun?  Aules waut ekj dan kaun doonen es miene Sind bekjanen un froagen fa Vejäwunk, un bäden daut Gott woat siene goode Oabeit en mie doonen.  Wie denkjen doa foaken nich aun, oba ondankboa sennen es eene Sind!
            Ekj sie mie secha daut ekj nich de eensja sie waut dit Trubbel haft.  Too foaken sat ekj mie selfst hecha aus Gott un dan doo ekj leewa waut ekj well aus waut Gott well.  Dit Trubbel kjemt fa aulemaun wan wie blooss aun ons selfst denkjen;  dit heet Selfstsucht.  Selfstsucht meent, "de Toostaunt wua eena blooss aun sikj selfst denkjt un woo eena eenen Jewenst haben kaun," (Ed Zacharias, Ons Ieeschtet Wieedabuak).  Selfstsucht es de Uasoak wuarom wie aus Menschen motten met Sind kjamfen!  Wuarom deeden Adam un Eva von de Frucht nämen waut an aufjesajcht wort?  Wiels see wullen daut haben waut see noch nich hauden!  Gott haud an jesajcht daut see nich sullen, un see deeden oba doch;  dit es wua de Selfstsucht aunfunk.  De Schreft sacht, "Lot junt nich daut jankren, waut de Noba haft, nich sien Hus, nich siene Fru, ooda sien Oabeida, ooda Kjäakjsche, ooda Oss, ooda Äsel, ooda irjent waut, waut däm Noba sient es," (2 Mose 20:17).  Wie sellen nich Selfstsucht ooda Jiez haben.  "Doawäajen moakt aules en junt doot waut von june sintliche Natua kjemt, de Huararie, Orreinichkjeit, sintelje Liedenschoften, beese Lost un Jiez.  Jiez es krakjt soo aus Jetta deenen," (Kolossa 3:5).
            Waut dan?  Wie lieden aule unja dise Sinden; woo kaun eena Selfstsucht loos woaren?  De Auntwuat es toom bäden met een dankboaret hoat.  Wan wie Gott danken fa aules waut hee ons jeft, dan denkj wie dolla aun de Säajnungen waut wie aul haben.  Dit es wuarom Paulus sacht daut wie sellen bäden met dankscheen sajen.  Wan wie bliewen en dankscheen sajen, dan woa wie nich soo leicht aun ons selfst denkjen, un dolla aun Gott.  Dan woa wie uk am dolla lowen fa waut hee aul jedonen haft.  Dankboa sennen halpt ons uk met onse sorjen, wiels daut wiest ons aul de goode Dinja waut Gott haft fa ons jedonen.  Dan denkj wie nich soo leicht aun aul de Trubbels waut kunn morjen komen.
            Doa es noch een Dinkj waut passieet wan wie dankboa sennen:  Gott jeft ons Fräd!  Fräd em Hoat, un Fräd en Jedanken.  "Un Gott sien Fräd, dee wiet äwa aules jeit waut Menschen vestonen kjennen, woat june Hoaten un Jedanken en Christus Jesus bewoaren!" (Filippa 4:7).