Andrew & Deanna Friesen

Kjikj Nopp!

Hoolt Faust Aun Gott Sien Wuat
"Well wie Jesus emma em Uag hoolen, dee dän Gloowen en ons aunjefongen haft, un uk foadich moaken woat.  Jesus haud kunt Freid haben, oba hee neem daut lieden aum Kjriez, un de Schaund, soo aus wan daut nuscht wia, un haft sikj aun de rajchte Sied von Gott sien Troon jesat."
Hebräa 12:2
  • Home
  • About Andrew and Deanna
  • Kjikj Nopp!
  • Updates
  • Contact

7/18/2018

Staunthauft Woaren

0 Comments

Read Now
 
Toom Läsen:  Jakobus 1:2-4
          "Miene Breeda, nämt daut met Freiden aun, wan jie opp veschiedne Wäaj jeprooft un vesocht woaren.  Doaderch daut jun Gloowen en de Vesieekjungen bestonen blift, lia jie jeduldich sennen.  Daut derw jie weeten.  Derch jeduldich sennen sell jie bat aum Enj behoolen bliewen, daut jie fälaloos un onbeschädicht sent, un junt daut aun nuscht fält."
 
 
            Staunthauft sennen see wie aus een goodet Dinkj, oba staunthauft woaren jeit nich sea scheen.  Daut meent derch lieden, Weedoag, Schwierichkjeiten, un schwoare Tieden derch gonen, oba enne Lenj brinjt daut Gott de Iea un moakt ons dolla soo aus Jesus Christus es, un daut sull fa jieda Kjrist daut Haupt sennen von Läwen.  Daut meent wie motten von ons Selfst looss loten, un ons faust hoolen aun Christus un de Vespräakjungen von Gott sien Wuat.  Wie weeten daut eendoont waut wie derch gonen, Gott haft jesajcht, "Ekj woa die nich veloten, die nich em Stich loten," (Hebräa 13:5).  Gott es Staunthauft, un hee woat bie ons sennen wan wie ons daut uk lieren.
            Jakobus sajcht, "Miene Breeda, nämt daut met Freiden aun, wan jie opp veschiedne Wäaj jeprooft un vesocht woaren," (Jakobus 1:2).  Veleicht jeit daut nich scheen jrod wan wie doa derch gonen, oba wie weeten waut daut en ons deit.  Dit es de Uasoak wuarom wie kjennen ons freien wan wie derch Trubbel gonen:  "Oba nich blooss daut.  Wie sent hia uk froo, wan wie lieden motten, wiels wie weeten, daut wie derch lieden lieren jeduldich staunthauft to sennen.  Staunthauft sennen but onsen Charakta opp, un daut wirkjt en ons Hopninj.  Hopninj lat ons nich toschaund woaren, wiels ons derch dän Heiljen Jeist, dee ons jejäft es, Gott siene Leew en onse Hoaten jegoten es," (Reema 5:3-5).  Wie kjrieen Jedult, Charakta, un Hopninj wan wie lieden, un fa dee Uasoak sell wie ons freien.  Trubbel un Liet sent de Dinja waut een Kjrist moakt waussen em Gloowen; wan Gott daut nich wudd loten, dan wudd wie nich waussen.  Daut  es nich ne Äwarauschunk fa Gott wan wie derch lieden gonen; en siene Weisheit wist hee aul verhäa daut et wudd woaren.  Reema 8:29 sajcht, "Dee, dee hee verhäa jewält haud, haud hee bestemt sienen Sän to likjnen."  Gott lat ons aus Kjristen derch lieden gonen wäajen daut moakt ons dolla soo aus Christus, un hee jinkj derch schwandre Lieden aus wie aula.  Jakobus sajcht uk, "Derch jeduldich sennen sell jie bat aum Enj behoolen bliewen, daut jie fälalooss un onbeschädicht sent, un junt daut aun nuscht fält," (1:4).  Daut Enj von derch Lieden gonen es fälalooss woaren, un blooss derch Gloowen en Gott kaun daut woaren.  "Seelich es dee Maun, dee nich vesajcht, wan hee vesocht woat, un uthelt, wan hee oppe Proow jestalt woat.  Wan hee de Proow bestonen haft, woat am de Läwenskroon jerieekjt woaren, dee de Har dämjanjen vesproaken haft, dee am goot es," (Jakobus 1:12).  Wie weeten goot daut soo lang aus wie opp dise Ieed läwen, woa wie nich fälalooss sennen, wiels wie lieden noch unja de Sind en ons Fleesch.  Oba wan bat aum Enj von Läwen staunthauft sennen, dan woa wie fälalooss woaren.  "Bliew tru bat em Doot, dan woa ekj die de Läwenskroon jäwen," sajcht Jesus en Openboarunk 2:10.  Wan wie ieescht stoawen, dan woa wie gaunz frie jemoakt von de Sind.
            Jo, de Schreft sajcht väl von ons freien wan wie derch Schwierichkjeiten gonen.  Dee sajcht uk väl von woo schwoa daut es schaftich sennen wan soont passieet.  Hiob wort dit en aus hee sien Trubbel derch jinkj, wiels hee wia nich schaftich aus hee hieed waut aula too am passieet wia.  Aul siene Tieren worden am fuat jenomen, un meist aul siene Oabeida worden omjebrocht, un uk aul siene Kjinja; oba siene Auntwuat wia dan noch, "De Har haft jejäft, un de Har haft jenomen.  Mucht däm Harn sien Nomen jeloft woaren," (Hiob 1:21).  Ekj stal mie väa daut hee säd dit doabie daut de Tronen schälden vom Jesecht rauf.  Doa es een groota Unjascheet tweschen schaftich sennen un Freid haben; Hiob sien läwen wiest ons de Unjascheet.  Hee wist nich wuarom dit haud passieet, oba hee jleewd doawäajen noch aun Gott un siene Leew fa am.  Gott well haben daut wie ons soo deemootjen derch lieden aus Hiob deed, un tru bliewen to am, wiels daut brinjt am Iea.  Doaderch woa wie uk fälalooss woaren wan wie tru bliewen bat aum Enj.  Lieden en dit Läwen dreit onse Uagen wajch von de Welt un trigj no Gott, un hee es emma met ons un woat ons nich auleen loten.  Well wie Moot foten derch dise Woarheit vondoag.

Share

0 Comments



Leave a Reply.

Details

    Schriewa

    Ekj sie Andrew Friesen.  Ekj un miene Fru, Deanna, sinj toop met D'Friesens wan wie oppe Reis sent, un tweschen en moak ekj Programs toom Menschen helpen waussen en daut Kjristen Läwen.  Ekj hop dit Program woat een Säajen sennen fa die!

    Picture
    Wan jie Froagen haben, ooda mie wellen Moot too sproaken, dan lot mie weeten!  Ekj woa soo schwind aus mäajlich eene Auntwuat haben fa die.  Jie kjenn mie hia uk weeten loten wan jie wellen ons Nies Breef kjrieen.  Wie proowen aule dree Moonat ooda soo een nieet Breef rut to schekjen äwa email, toom Menschen weeten loten waut ons drock helt.  Dankscheen!
    Wan jie aun ons denkjen, doot wellich uk bäden fa ons.  Ons fält soo väl Unjastettunk aus mäajlich!

      Lot mie Weeten!

    Submit

    Wan du dise Oabeit west met Jelt unjastetten, dan drekjt opp de Knups fuaz unja dise Wieed.  Daut woat die bat daut Blaut brinjen wua jeit Jelt to jäwen.  Go delenjd bat du Andrew and Deanna Friesen finjst, un daut äwaje es leicht jedonen!
    Ooda, du kaust mie een Whatsapp schekjen, un dan kjenn wie wieda beräden von doa!  Mien Numma es +1 204 361 6868.  Dankscheen sea, un Gottes Säajen met die!
    Unjastett Ons


​Thank you for Visiting. Come again soon!


Telephone

1 (204) 361-6868

Email

andrewanddeannafriesen@gmail.com
  • Home
  • About Andrew and Deanna
  • Kjikj Nopp!
  • Updates
  • Contact