Well Wie Onse Sinden Bekjanen

Toom Läsen:  1 Johanes 1:6-10
             "Wan wie sajen, daut wie to Gott jehieren, un oba enne Sind em diestren Läwen, dan lieej wie un doonen nich de Woarheit.  Wan wie oba em Licht von Gott läwen, soo aus hee em Licht es, dan hab wie Jemeenschoft unjarenaunda, un daut Bloot von sien Sän Jesus Christus moakt ons rein von aule Sind.  Wan wie sajen, wie haben kjeene Sind, dan lieej wie ons selfst waut väa un haben de Woarheit nich en ons.  Wan wie onse Sinden bekjanen, dan es hee tru un jerajcht, un vejeft ons de Sinden un reinicht ons von aule Ojjerajchtichkjeit.  Wan wie sajen, wie haben nich jesindicht, dan saj wie doamet, daut Gott lieejen deit, un sien Wuat es noch nich rechtich en ons."
 
 
            Johanes moakt daut kloa en sien ieeschtet Breef daut kjeena es onen Sind, nich mol de Kjrist.  Wan wie sajen daut wie nich Sind haben, dan moak wie Gott too een Läajna un dan hab wie nich dee Woarheit (Varsch 8, 10).  Hee sajcht oba uk daut wie kjennen de Sind looss woaren un nich mea met droagen, wiels wan wie onse Sind bekjanen, dan vejeft hee ons un reinicht ons von aule Ojjerajchtichkjeit.  Dit es sea wieetvoll, wiels wan hee sajcht "aule" daut meent uk daut waut wie nich enwoaren.  To mie rät dise Schreft nich von Räajlen, daut wie motten onse Sinden too aundre bekjanen, oba leewa daut wie Gott siene Jnod aunnämen, daut wie ons kjennen freien toom von de Sind looss sennen.  Wan wie Gott siene Woarheit haben, dan weet wie daut wie Sind haben, un aus Gottes Kjinja well wie heilich sennen; daut meent de Sind looss woaren.  Ons velangen es dan toom heilich sennen.
            Doa sent uk aundre Schreft Städa waut von dit räden.  Jakobus 5:16 haft väl to sajen wäajen bekjanen un vejäwen:  "Bekjant june Sinden eena toom aundren un bät eena fa dän aundren, daut jie kjennen jeheelt woaren."  Wie motten hauptsechtlich to Gott bekjanen, wiels toom Kjristen woaren mott wie vonne Sind wajch dreien, un toom vonne Sind wajch dreien mott wie ieescht weeten waut Sind es.  Ea wie kjennen Vejäwunk kjrieen mott wie en woaren daut ons de Vejäwunk fält.  Wie motten to Gott bekjan wiels Hee es de Eensja wäa Sinden kaun vejäwen.  Jakobus rät oba von Heelunk.  Denkjt doa aun daut hee schreef dise Wieed no Kjristen;  see hauden Jesus aul aunjenomen.  Bekjanen eena toom aundren deit de Jemeenschoft heelen tweschen Kjristen.
            Jesus rät uk von bekjanen.  "Wan du nom Aultoa jeist diene Gow to opfren un die doa biefelt, daut dien Brooda waut jäajen die haft, dan lot diene Gow doa ver däm Aultoa ligjen un go un moak ieescht Fräd met dienen Brooda, un dan go un brinj diene Gow," (Matäus 5:23-24).  Onse Jemeenschoft met dee waut romm ons wonen es een Tieekjen von onse Jemeenschoft met Gott.  "Wan wäa sajcht, hee haft Leew fa Gott, un es sienen Brooda oba fientlich jesonnen, dee licht.  Wäa sienen Brooda nich goot es, dän hee sitt, dee kaun Gott nich goot sennen, dän hee nich sitt," (1 Johanes 4:20).  De Schreft moakt daut kloa daut soone waut doa jerajcht sennen ver Gott woaren uk proowen toom rajchte Jemmenschoft haben met aulemaun romm an.  Dit es wuarom Jesus säd, "Wan jie Menschen daut vejäwen, wan dee sikj jäajen junt vesindjen, woat jun himlischa Voda junt uk vejäwen.  Oba wan jie aundre Menschen äare Sinden nich vejäwen, woat jun Voda junt june Sinden uk nich vejäwen," (Matäus 6:14-15).  Dit meent nich daut aundre vejäwen es nu blooss een von de Sitten waut wie motten no foljen, oba daut es leewa een Tieekjen von Gott siene Jnod en ons.  Woo kjennen wie sajen daut wie haben Vejäwunk jekjräajen, un oba nich aundre Menschen vejäwen?  Wan wie nich aundre Menschen kjennen vejäwen, dan hab wie nich werkjlich dee Vejäwunk bejräpen, dee wie haben, un dan hab wie uk nich onse Sind werkjlich bejräpen, woo groot un woo schlajcht dee es.  Dan sent wie soo aus de beesa Kjnajcht von Matäus 18:23-35.  Siene groote Schult wort am vejäft, oba hee deed daut nich, sien met-Oabeida siene kjliene Schult vejäwen.
            De Punkt es, wan wie onse Sinden bekjanen ver Gott, dan woat Hee ons vejäwen.  Wie motten dan von onse Sind wajch dreien derch de Krauft dee kjemt derch Gott siene Jnod, un blooss fa am läwen.  Wan wie daut aunnämen, daut Gott ons vejäft haft, dan well wie uk aundre Menschen äare Sinden vejäwen.  De Uasoak wuarom wie bekjanen es toom de Sind looss woaren, soo daut wie met eena dän aundren kjennen Jemeenschoft haben.