Wie Haben Hopninj

Toom Läsen:  Reema 15:8-13
         "Ekj saj junt, daut Jesus Christus de Juden deend om Gott siene Woarheit fausttostalen, daut hee daut derchfieed, waut hee äare Vodasch vesproaken haud; un daut de Velkja Gott fa siene Jnod lowen muchten, soo aus daut jeschräwen steit:  "Doawäajen well ekj die manke Velkja lowen un von dienen Nomen sinjen."
             Noch eemol sajcht daut:  "Oo Velkja, freit junt met sien Volkj met!"
             Un noch eemol:  "Aul jie Velkja, loft dän Harn.  Sinjt, aule Velkja, am to lowen."
             Un noch eemol sajcht Jesaja:  "Doa woat von Isai eene Wartel komen, dee doa rut komen woat, äwa de Velkja to harschen.  Opp däm woaren de Velkja äare Hopninj saten."
       Mucht dee Gott, von däm aule Hopninj kjemt, junt derch junen Gloowen en am, vollopp Freid un Fräd schenkjen, daut june Hopninj derch dän Heiljen Jeist siene Krauft, en junt waussen mucht."
 
 
           Hopninj es een wundaboaret Dinkj en een Mensch sien Läwen.  Dee wäa Hopninj haft kaun stoakj sennen wan aules romm am tonicht jeit, oba dee wäa kjeene Hopninj haft, haft uk kjeene Fräd, soogoa wan hee aules haft waut am kunn jankren.  Hopninj es dee Unjascheet tweschen een Läwen waut Meenunk haft un een Läwen waut gaunz ladich un nuzlooss es.  De Kjrist haft de jratsta Hopninj von aule Menschen, wiels siene Hopninj es nich en irjentwaut, waut opp dise Ieed es, oba en Gott siene Vespräakjungen un en siene Krauft.
            En Reema Kapitel 5 sajcht Paulus daut wie haben Hopninj wiels wie jleewen aun Jesus Christus.  "Wiels wie derch dän Gloowen jerajcht jeworden sent, hab wie Fräd met Gott derch onsen Harn Jesus Christus, derch dän ons de Wajch opjinkj no de Jnod, en dee wie stonen.  Un wie freien ons en de Hopninj, Gott siene Harlichkjeit to seenen," (Reema 5:1-2).  Dise Hopninj es jrata aus aule irdische Sachen; daut es eene Hopninj fa waut väle Kjristen derch aule Tieden, un Paulus selfst, äare Läwes haben jejäft.  Dise Hopninj waut wie haben kaun de Welt nich stellen, wiels dee es en Jesus, un Hee haft dise Welt jewonnen (Johanes 16:33).  Paulus sajcht uk noch dit:  "Oba nich blooss daut.  Wie sent hia uk froo, wan wie lieden motten, wiels wie weeten, daut wie derch lieden lieren jeduldich staunthauft to sennen.  Staunthauft sennen but onsen Charakta opp, un daut wirkjt en ons Hopninj.  Hopninj lat ons nich toschaund woaren, wiels ons derch dän Heiljen Jeist, dee ons jejäft es, Gott siene Leew en onse Hoaten jegoten es," (Reema 5:3-5).  Met soone Hopninj aus dit hab wie dän jratsten Säajen von aule Menschen.
             Waut vonne Hopninj hab wie?  Wie haben Hopninj en de Radunk, dee wie jekjräajen haben, un uk toom oppwakjen vom Doot, un too een Oafgoot em Himmel!  "Loft Gott, onsen Harn Jesus Christus sien Voda, wiels sien Metlieden wia soo groot, daut hee ons niejebuaren haft to eene läwendje Hopninj, doaderch daut hee Jesus Christus vom Doot oppwuak, un to een Oafgoot daut nich vekomen, vegonen ooda vewalkjen kaun, daut fa ons em Himmel bewoat woat," (1 Petrus 1:3-4).  Wie haben Hopninj toom Metoawen sennen met Christus toop, un aul Gott siene Kjinja (Reema 8:17).  Wie haben Hopninj daut wie woaren Gott selfst seenen, daut Gott ons woat aus Säns oppnämen un von onse vejenjkliche Kjarpasch friemoaken (Reema 8:23).  "En Hopninj word wie jerat.  Oba eene Hopninj dee eena seenen kaun, es kjeene Hopninj.  Wuarom sull eena opp waut hopen, daut eena sitt?" (Reema 8:24).
            Dise Hopninj es soo secha aus Gott Sien Wuat.  De Schriewa von Hebräa sajcht daut Gott kaun nich lieejen;  Hee haft ons dise Vespräakjungen jejäft.  Daut meent dee sent secha.
            "Doawäajen haft Gott uk sien Vespräakjen bekjrafticht met een Eit.  Doamet wull hee de Oawen von      sien Vespräakjen daut sea kloa moaken, daut daut gaunz secha soo bliewen wudd.  Soo sent doa         tweealei, dee nich endren, – wiels daut es ommäajlich, daut Gott lieejen woat – wuamet wie väl Moot           nämen kjennen, ons aun dee Hopninj to hoolen, dee ons aunjeboden es.  Dise Hopninj hab wie aus eenen    fausten, sechren Anka fa onse Seel, un dee jeit bat hinja dän Väahank em bennaschten Heilichtum em       himlischen Tempel," (Hebräa 6:17-19).
Daut wia Gott Sien Plon gaunz von de Aunfank Welt toom Radunk volbrinjen fa dee waut aun Am jleewen, un waut Gott jeplont haft, woat volbrocht.  Doawäajen kjennen wie secha sennen en onse Hopninj.
            De Schreft jeft ons noch eene Uasoak fa Moot.  Reema 15:4 sajcht, "Wautemma verhäa jeschräwen wia, wia jeschräwen, daut wie doarut lieren sullen, daut wie derch de Jedult un dän Troost en de Schreft wudden Hopninj haben."  Es daut nich wundaboa!  Jesus Christus es de Uasoak fa Hopninj fa aule Menschen, un nich blooss daut;  dee gaunze Schreft, dee Gott ons jejäft haft, es jeschräwen soo daut wie kjennen Hopninj haben!  Gott sien Wuat es jeschräwen soo daut wie kjennen Hopninj haben, un sien Sän kjeem toom ons Hopninj brinjen, soo daut wie am wuaren aunnämen aus Heilant un Har.  Wie haben aules waut ons fält en Christus.